O Ministerio de Transportes, Mobilidade e Axenda Urbana (Mitma) executa as obras de construción da glorieta de conexión da N-6, no punto quilométrico 441+400, co ramal de saída 438 da A-6 en sentido Madrid. As obras non afectan o tronco da autovía, segundo sinala.
Para a execución dos traballos, produciranse afectacións ao tráfico en Noceda, nas inmediacións da intersección desde as 8,00 horas do luns 21 e as 15:00 horas do venres 15 de setembro.
En concreto, haberá un corte do ramal de saída da A-6 en sentido Madrid, que estará pechado ao tráfico durante a execución das obras.
Para este caso, as saídas recomendadas como alternativa ao ramal cortado serán a ligazón do punto quilométrico 444, As Nogais, para vehículos lixeiros, e 451, Becerreá, para pesados.
O resto dos ramais da ligazón do punto quilométrico 438 permanecerán operativos.
Tamén haberá corte dun carril entre os puntos quilométricos 441+200 e 441+600 da N-6. Neste caso desviarase o tráfico polo carril contiguo co obxecto de manter o paso alternativo de ambos os sentidos de circulación.
Os traballos consisten na substitución da actual raqueta por unha nova glorieta pechada e na instalación dunha nova sinalización, balizamento e defensas e outras obras complementarias.
Estas obras están a levarse a cabo no marco das actuacións para a mellora da seguridade viaria e o transporte de mercadorías das obras de emerxencia para a reconstrución dos viadutos do Castro.
