A Xunta cedeu ao Concello de Cospeito unha parcela, tres viarios, dúas zonas verdes e unha peonil no parque empresarial de Muimenta, unha superficie total de 15.752 metros cadrados.

Así se plasmou este venres na firma dun acordo pola vicepresidenta segunda e conselleira de Medio Ambiente, Territorio e Vivenda, Ángeles Vázquez, e o alcalde da localidade, Armando Castosa, no que estivo presente o delegado territorial da Xunta en Lugo, Javier Arias.

O Goberno galego cedeu tamén a parcela P-24, de máis de 1.500 metros cadrados. Segundo informa o Executivo, nesta área empresarial realizáronse actuacións relativas á urbanización, conexións ás redes de saneamento, abastecemento, telefonía e electricidade e as ligazóns coa estrada LU-120 e co viario do que xa dispuña o parque. Ademais, instalouse unha zona de descanso e lecer con xogos.

Na actualidade, engade, este parque de Muimenta ten a disposición do tecido produtivo un total de 13 parcelas, de entre 423 e 1.605 metros cadrados. O prezo de chan oscila entre os 41 e os 45 euros por metro cadrado, unha vez aplicada a bonificación do 50% que a Xunta ofrece nas áreas empresariais da súa propiedade na provincia de Lugo.