En agosto, o Concello comezaba unha obra longamente agardada pola cidadanía de Lugo, a supresión do tapón urbanístico da Avenida da Coruña. Tres meses máis tarde, o bloque que ameazaba o paso seguro dos peóns pola estratéxica vía é cousa do pasado. Coustou corenta anos resolver a aberración parcelaria.
O gabinete de Lara Méndez solventa así a histórica demanda da veciñanza da Avenida da Coruña, das rúas máis transitadas da cidade. A importancia da intervención acrecéntase polo carácter comercial da zona, conexión entre varias áreas residenciais e importantes servizos. O resultado foi apreciado en directo pola alcaldesa e mailo concelleiro de Infraestruturas Urbanas, Manuel Núñez.
Para executar os traballos foi precisa a expropiación de terreos en tres parcelas, conlevando indemnización para dezaséis propietarios e outra para Acrobasing S.L. pola extinción dun valado de uso publicitario. En total, foron 172 metros cadrados de superficie sen aliñar e un importe compensatorio de 60.000 euros.
Despois, o esforzo de demolición, corrección e urbanización da beirarrúa supuxo un investimento engadido de 36.000 euros, resultando nun amplo espazo público na Avenida da Coruña, e que antes constituía un perigo para os viandantes. Os prazos previstos cumpríronse satisfactoriamente, cun aforro de catro mil euros sobre o orzamento inicial.