O Ministerio para a Transición Ecolóxica e o Reto Demográfico presentou os resultados da segunda convocatoria de axudas para proxectos piloto de comunidades enerxéticas, cun investimento superior ao millón de euros.
A mesma resolveuse cun total de 29 proxectos beneficiarios, que inclúen máis de 470 actuacións en 12 comunidades autónomas e que mobilizarán un investimento de 67 millóns de euros, a partir dun orzamento de 30 millóns.
Entre eles, e como segundo proxecto máis valorado a nivel nacional, está ‘Begonte Xera’, que recibe unha axuda de 2,7 millóns de euros para executar o seu proxecto neste concello da provincia de Lugo. Nel participan particulares, pemes e o concello co obxectivo de cubrir as necesidades enerxéticas do municipio usando para iso enerxía 100% renovable.
‘Implementa’ forma parte do primeiro programa de axudas a nivel estatal específico para comunidades enerxéticas, co obxectivo de impulsar a innovación social e a participación cidadá en enerxías renovables, eficiencia enerxética ou mobilidade eléctrica, no marco do Plan de Recuperación, Transformación e Resiliencia.
A secretaria de Estado de Enerxía, Sara Aagesen, presentou os resultados este xoves, nun acto organizado na sede da Delegación do Goberno en Galicia con presenza do seu máximo responsable, José Miñones, e do director xeral do Instituto de Diversificación e Aforro de Enerxía, Joan Groizard.
No acto, explicouse que os 29 proxectos beneficiarios involucran a máis de 93.000 actores, sendo as 85% persoas físicas sociais e o restante 15%, pemes e entidades locais, o que, segundo Aagesen, “demostra o interese que existe entre a cidadanía por converterse en actor protagonista da transición enerxética e a capacidade das comunidades enerxéticas para articular esta mobilización”.
ARRAIGAMENTO NO TERRITORIO
Así mesmo, o 41% dos proxectos seleccionados desenvólvense en municipios de reto demográfico. “A maioría dos proxectos teñen un forte arraigamento co territorio, o 59% dos casos ten aos seus socios nun radio máximo de 25 quilómetros da comunidade enerxética, desta forma os beneficios ambientais, económicos e sociais revértense de maneira directa na contorna”, indicou Joan Groizard.
Tanto a secretaria de Estado como o director xeral incidiron, ademais, no obxectivo de promover a inclusión dos consumidores vulnerables. E é que o 3% das iniciativas seleccionadas buscan abordar a pobreza enerxética a través da inclusión de consumidores vulnerables entre os seus socios e máis da metade (55%) presenta plans de igualdade de xénero como parte da súa gobernación.
Ademais, o próximo 19 de decembro ábrese o portelo para as convocatorias ‘CE Implementa’ 3 e 4 que, con 10 e 30 millóns respectivamente, seguirán subvencionando proxectos pequenos, medianos e grandes de comunidades enerxéticas.
