Galicia asinou 12.716 contratos en agricultura durante o primeiro semestre do ano, fronte aos 13.555 rexistrados o ano pasado, o que se traduce nunha caída do 6,2%, 8,3 puntos porcentuais máis moderada que a media estatal (-14,5%). Deste xeito, o volume de contratos rexistrado no país supón o 1% do total que se rubricaron en España.
Así o constata un estudo da empresa Ranstad que sinala que, a nivel provincial, a contratación en Pontevedra e A Coruña incrementouse con respecto ao primeiro semestre de 2021, un 1 e un 0,5% respectivamente, mentres que en Ourense caeu un 10,9% e en Lugo un 22,8%. En canto aos volumes, A Coruña rexistrou o maior número de firmas no sector (4.841), seguida por Pontevedra (4.161), Lugo (2.584) e Ourense (1.130).
No conxunto do Estado, a agricultura xerou 1.248.638 contratos, dos cales o 74,2% corresponden a contratos de duración determinada (926.790) e o 25,8%, a indefinidos (321.848).
O volume deste ano é un 14,5% inferior ao do seis primeiros meses de 2021, aínda que os indefinidos disparáronse no actual, multiplicándose aproximadamente por cinco. De feito, en 2021, os contratos indefinidos apenas supuñan o 4,3%, mentres que actualmente representan o 25,8%.
