O secretario xeral do PSdeG, Valentín González Formoso, avisou á Xunta de que “non se pode xogar coa xente” en relación co proxecto de Altri ao anunciar a súa localización en Palas de Rei antes de ter garantida a solvencia, polo que considera que “hai que ser serios”.
En declaracións este sábado en Santiago, Formoso reafirmou a posición “clara e rotunda” do partido para a “defensa dos proxectos solventes para Galicia”, pero subliña a “importancia” da “seriedade e claridade”.
“Altri, primeiramente, estaba garantido que se ía a instalar na Mariña; despois estaba garantido que se vai a montar en Palas de Rei, despois xa non está tan garantido porque depende de fondos europeos e despois depende de que se acheguen 200 millóns de fondos europeos”, quéixase Formoso.
“No caso de Altri, non falan con claridade, non se pode xogar coa xente”, aseverou Formoso. Así mesmo, o secretario xeral do PSdeG emprazou á Xunta a que realice un apoio no caso de ser necesario un “suplemento” de fondos autonómicos para que os proxectos previstos saian adiante. “Non podemos permitir que por 15 ou 20 millóns de euros non se instale un proxecto que pode diversificar o sector forestal galego”, manifestou Formoso.
