A venda de coches de segunda man alcanzou as 121.380 unidades en Galicia en 2021, o que supón un incremento do 4,7% en comparación con 2020, segundo datos da Asociación Nacional de Comerciantes de Vehículos (Ancove).

Este incremento é inferior ao avance medio do 9% que se produce en España. O galego supón o segundo menor aumento, só por detrás de Cataluña (+3,2%). Con todo, o crecemento do mercado de ocasión contrasta co esborralle do 17,4% das matriculacións en Galicia en 2021.

Por provincias, Lugo tivo o mellor comportamento no mercado de ocasión no conxunto do ano, cunha subida do 6,78% en comparación con 2020 (16.399 vendas). En datos relativos, séguelle o crecemento do 6,4% de Ourense, con 13.559 unidades; Pontevedra (+4,38%), 43.944 turismos de ocasión; e A Coruña conta co menor incremento (+3,9%), 47.478 unidades.

No tocante ao mes de decembro, vendéronse en Galicia 11.964 turismos de ocasión, unha baixada do 17% respecto ao mesmo mes de 2020. No conxunto estatal, as vendas caeron un 5,4% en comparación co último mes de 2020.