A Deputación de Lugo inicia este luns a repartición a domicilio dos ‘Bonos Impulso’, para a súa utilización como método de pago no comercio e a hostalaría da provincia.

O presidente, José Tomei Roca, acompañado pola deputada de Réxime Interior, Promoción do Territorio e Turismo, Pilar García Porto; e o Deputado de Promoción Económica e Social, Pablo Rivera Capón, supervisou este domingo o dispositivo de entrega, do que se encargará unha empresa lucense e que achegará os descontos nominativos aos preto de 7.500 veciños da provincia que xa o solicitaron.

A institución provincial prevé repartir un total de 17.000 bonos de 30 euros para compras dun mínimo de 60 euros, que poden gastarse en calquera comercio, negocio de hostalaría e servizos, desde a súa recepción e ata o 31 de agosto deste ano.

Ata o próximo 15 de xullo está aberto o novo prazo para pedir estes descontos, que se poden solicitar a través da páxina web da Deputación de Lugo, da sede electrónica ou mediante o procedemento habitual, presentando a documentación nas oficinas de Rexistro.

O ente provincial estableceu unha serie de condicións para facer a repartición “máis xusto e equitativo”. Así, puxo un mínimo de 20 bonos para os concellos máis pequenos e un máximo de 5.000 para os máis grandes. Os bonos asignaranse por orde de presentación de solicitudes, respectando o número mínimo e máximo establecido de bonos por concello, e fixando nesta primeira fase de asignación un máximo dun bono por persoa.