O presidente da Asociación Provincial de Empresarios de Hostalaría de Lugo, Cheché Real, valorou os pasos anunciados este mércores polo Goberno galego e o Executivo Central para avanzar na desescalada do sector, do mesmo xeito que apremou á Xunta a axilizar a entrega das axudas para ao lecer nocturno.

Sobre o alivio de restricións, recoñeceu que no sector “hai certa satisfacción e hai esperanzas de empezar a traballar”, sobre todo no caso do lecer nocturno, posto que o novo marco permitirá igualar “os horarios da hostalaría en xeral”, que é o que viñan “solicitando” ao Goberno.

O montante establecido para as axudas ao lecer nocturno ascende a preto de catro millóns de euros “para os 400 establecementos que hai en Galicia”, engadiu, para lembrar que a Xunta xa conta cos 240 millóns de euros que puxo o Goberno central.

“E isto é moi importante porque hai que dotar de liquidez a todos os establecementos, por unha banda ao lecer nocturno que estiveron pechados sen posibilidade algunha de abrir as súas empresas, de facturar, e do resto da hostalaría que con estas limitacións tampouco puideron”, sinala Real.

Cheché Real resaltou que 16 municipios da provincia de Lugo, a través da Xunta de Galicia, “van facer chegar axudas directas a empresarios de hostalaría” e “isto vai axilizar moito a chegada de liquidez”.

“Practicamente o cento por cento dos concellos da provincia deron axudas dunha ou doutra forma, ou axudas directas ou a exención de impostos e taxas para que a situación fose máis levadía”, resolveu.