O número de parados rexistrados nas oficinas dos servizos públicos de emprego (antigo Inem) baixou en 5.472 persoas en maio en Galicia en relación co mes anterior, un 3,2%, unha décima menos que a media estatal, ata situar o total en 165.306 desempregados, segundo os datos que publica este mércores o Ministerio de Traballo e Economía Social. No caso de Lugo, é a provincia galega onde máis baixa o desemprego.

En comparación con maio de 2020, o paro caeu na comunidade galega nun total de 25.776 persoas, o que representa un descenso do 13,49%. No conxunto estatal, a diminución foi de 129.378 desempregados en maio (-3,3%) respecto de abril, o seu maior retroceso mensual de toda a serie histórica, que se inicia en 1996.

Por provincias, o desemprego reduciuse un 4,81% en Lugo, con 817 persoas menos nesta situación, o que deixou o total en 16.185 parados. Baixou un 3,17% na Coruña (2.172 parados menos, ata 66.363) e un 3,1% en Pontevedra (2.052 menos, ata 64.068). Por último, Ourense rexistrou un descenso do 2,25%, con 431 desempregados menos, ata 18.690.

Por sector de actividade económica, a diminución en 5.472 parados en toda a comunidade distribuíuse entre agricultura (-61), industria (-527), construción (-588) e servizos (-4.066). No colectivo sen emprego anterior, o desemprego caeu en 230 persoas en Galicia; mentres que entre estranxeiros alcanzou a 11.496 persoas, que son 420 menos que en abril (-3,52%) e 936 menos que en maio de 2020 (-7,53%).

MÁIS CONTRATOS

A comunidade galega anotouse un incremento dos contratos en maio, ata 66.533, que son 911 máis que en abril (+1,39%) e 35.660 máis que no mesmo mes de 2020 (+115,51%).

Deles, 6.385 foron indefinidos (1.078 menos que en abril, o que supón un descenso do 14,44%) e 60.148 temporais (1.989 máis, un aumento do 3,42%). No acumulado, son 303.812 contratos, a maior parte (268.880, o 88,5%) temporais.