O deputado de Deportes, Pablo Rivera Capón, mantivo este luns un encontro cos membros da Sociedade Deportiva Muimenta e do Club de Tenis de Muimenta. O Deputado aproveitou para coñecer de primeira man as necesidades destas entidades e informar dos investimentos do organismo provincial en materia de deportes no Concello de Cospeito.
Rivera Capón explicou que “dende o goberno da Deputación colaboramos cos diferentes clubs e entidades deportivas do municipio dentro da nosa aposta pola promoción do deporte base e dun estilo de vida saudable”. Así, ao longo deste ano a achega da autoridade provincial acadará os 15.500 euros para o impulso do deporte entre os veciños e veciñas deste concello chairego.
Deste total, 2.150 euros son para a celebración de tres eventos, 7.700 euros para sufragar os gastos da tempada dos cinco clubs desta localidade, e máis de 5.700 euros para o funcionamento das Escolas Deportivas.
Por outro lado, o representante provincial precisou que, nos dous últimos anos e medio, a Deputación adicou máis de 15 millóns ao impulso do deporte no conxunto da provincia, “ofrecendo unhas 2.500 axudas a equipos profesionais e deporte base en todas as modalidades ou promovendo a actividade deportiva de máis de 200 entidades lucenses”.
7.700 euros para 5 clubs de Cospeito
O Goberno da Deputación achega 7.700 euros para axudar a sufragar os gastos derivados da actividade competitiva de 5 clubs de Cospeito. Estes son os seguintes: Club Sociedade Deportiva de Muimenta, Club Deportivo Cospeito, Club Tenis Muimenta, Agrupación Deportiva Veteranos de Cospeito e AD Matela.
2.150 euros para a organización de 3 eventos
O Executivo Provincial fixo posible a organización de 3 eventos deportivos na vila de Cospeito cunha achega de máis de 2.150 euros. Estes foron os seguintes: Campionato de fútbol sete da Asociación Veciñal Santalla de Sisoi, Open Hermo de Tenis do Club Tenis Muimenta e a Ruta BTT Lagoa de Cospeito do Club B.T.T. Lagoa de Cospeito.
Máis de 5.700 euros para Escolas Deportivas
O Goberno da Deputación fai posible con 5.721 euros o funcionamento das Escolas Deportivas de Cospeito, a través das que os nenos e nenas do municipio poden desfrutar de diferentes actividades extraescolares como fútbol, baloncesto, balonmán, ximnasia, etcétera, coas que aprender valores como a superación, o xogo en equipo, a colaboración ou o compañeirismo, ademais de hábitos e costumes de vida saudables.
