A alcaldesa de Lugo, Lara Méndez, acompañada do concelleiro de Desenvolvemento Local e Emprego, Mauricio Repetto, mantivo un encontro este venres cos participantes da última edición do programa Inicia Coworking. Un total de 15 proxectos emprendedores nacidos en pleno confinamento da pandemia e formados a través do acompañamento dos profesionais do CEI Nodus, conseguiron poñer en marcha as súas propias empresas e xa se atopan facturando.
Estas iniciativas, que representan o 70% das seleccionadas nesta edición, van dende empresas turísticas a outras de enxeñaría, hostalaría, arte, sustentabilidade ou innovación, entre outros.
A alcaldesa felicitou os emprendedores “pola valentía que teñen demostrado, pois nun momento de gran incerteza, pola situación sanitaria e económica que atravesamos como consecuencia da pandemia, foron quen de sobrepoñerse e, con gran esforzo, iniciar o seu negocio, polo que o mérito é dobre”. “Sodes o exemplo do enorme talento que atesora a cidade”, sostivo.
Das 15 empresas xeradas, sete están instaladas no CEI Nodus, “outro dato moi positivo, pois demostra o gran interese que xera este viveiro co que contamos no Concello”, resaltou. Pola súa banda, os emprendedores explicaron que, pese a que por primeira vez a edición do coworking foi online debido ao confinamento, conseguiron crear unha rede de apoio e sinerxías entre eles.
NOVA EDICIÓN DO COWORKING
O prazo de inscrición para a sexta edición do programa xa se atopa aberto na plataforma disposta para tal. En total ofértanse 22 prazas e, como na anterior edición, a formación será online. As persoas interesadas poderanse apuntar ata o vindeiro 20 de febreiro.
O programa constará de 60 horas lectivas, durante as cales se formará os participantes en ámbitos como a metodoloxía Lean-Canvas, o desenvolvemento e a validación do modelo de negocio, o plan comercial e as técnicas de venda, a oratoria ou o plan de márketing dixital, entre outros aspectos. Ademais, contarán con titorías personalizadas que lles axudarán a materializar a súa idea de negocio.
