EFE | O presidente da Asociación Provincial de Empresarios de Hostalería e Turismo de Lugo (Apehl), Cheché Real, recoñece que os profesionais do sector “xa non ven a luz ao final do túnel” e están a perder “a esperanza”, tanto pola situación económica como polo desgaste “psicolóxico”.
Real lamentou que “o punto de mira” siga posto no sector da hostalaría, que “cada vez está peor desde o punto de vista económico”. Aseguran que xa non confían nunha recuperación durante a primeira parte deste ano, logo de coñecerse as novas medidas que endurecen as restricións nos locais hostaleiros.
Segundo Real, a situación económica do sector “é un caos”, pero o sector tamén está moi tocado “psicoloxicamente”, porque os profesionais conviven coa “inquietude” e coa “incerteza” desde hai moitos meses, “pendentes cada martes” de novas decisións, ás veces en forma de restricións severas, que afectan non só á súa conta de resultados senón tamén á planificación da súa propia actividade.
NOVAS MEDIDAS
A Xunta avanzaba na tardiña de onte unhas restricións máis severas para o sector hostaleiro, medidas que concretaron na mañá deste mércores. Os locais só poderán abrir ata as 18:00 en toda Galicia, e a posibilidade de servir no interior vén determinada pola condición de concello en nivel de alerta media-alta ou alerta máxima.
No caso da provincia, Vilalba, Viveiro e Xove son os que se atopan na segunda desas situacións. Así pois, bares e restaurantes só poderán atender os seus clientes en terraza, cunha capacidade do 50%. No resto de municipios (incluído Lugo capital), permítese consumir no interior dos locais ao 30% e no exterior ao 50%.
