O PPdeG denunciou este sábado atrasos e falta de avances nas infraestruturas viarias estatais da provincia de Lugo, cunha atención especial á A-54, a autovía destinada a completar a conexión por estrada de alta capacidade entre Lugo e Santiago de Compostela. Representantes do partido reuníronse en Nadela para reclamar ao Goberno central a conclusión dos proxectos pendentes e criticar o estado dalgunhas das principais vías que atravesan a provincia.
No encontro participaron a secretaria xeral do PPdeG, Paula Prado; a alcaldesa de Lugo, Elena Candia; e o coordinador de Infraestruturas dos populares galegos, Antonio Ameijide, xunto con outros cargos do partido. Candia exerce a Alcaldía lucense desde maio deste ano, tras a moción de censura que provocou o cesamento de Miguel Fernández.
A principal reclamación centrouse na A-54, que continúa sen estar completada na súa totalidade. O propio Ministerio de Transportes prevía en marzo de 2025 que a infraestrutura estivese finalizada a finais dese mesmo ano, unha previsión que non chegou a cumprirse. O visor oficial de obras do Ministerio segue incluíndo actualmente o tramo Arzúa-Melide entre as actuacións en execución.
“A A-54, que debería comunicar ambas as cidades, segue sen rematar. O Goberno de Sánchez leva tempo incumprindo os anuncios sobre a súa finalización”, afirmou Prado, que cualificou a situación como parte dun “castigo” á provincia de Lugo en materia de infraestruturas e acusou o Executivo estatal de reiterar “incumprimentos” e “recortes”.
A secretaria xeral dos populares galegos estendeu as críticas ao conxunto de Galicia e responsabilizou tamén o BNG pola súa relación parlamentaria co Goberno estatal. “A culpa non é só do PSOE, senón tamén do BNG, porque sostén a Sánchez na Moncloa a cambio de absolutamente nada para Galicia. Son os do si a Sánchez e o non constante a Galicia”, declarou.
Pola súa banda, Elena Candia reprochou ao ministro de Transportes, Óscar Puente, que non se materializase a previsión de completar a autovía a finais de 2025. “Os lucenses seguimos agardando”, sinalou a alcaldesa, mentres Ameijide sostivo que a infraestrutura “caeu no esquecemento” por parte do Executivo de Pedro Sánchez.
CRÍTICAS AO ESTADO DAS AUTOVÍAS E ESTRADAS NACIONAIS
O PPdeG ampliou as súas reclamacións a outras infraestruturas dependentes do Estado na provincia. Entre elas citou as estradas N-540, entre Lugo e Ourense; N-120, que atravesa o sur lucense; e N-642 e N-634, na Mariña, sobre as que denunciou problemas de mantemento.
Os populares tamén reclamaron actuacións na A-6, principal eixo de comunicación por estrada entre Lugo e a Meseta, ao considerar que existen tramos cun firme deteriorado. A estas críticas sumaron a situación de varias autovías proxectadas na provincia que continúan sen estar completadas.
Unha delas é a A-74 da Mariña, concibida para mellorar a conexión do corredor cantábrico coa Mariña Occidental. A formación fala dunha situación de “parálise”, aínda que o Ministerio aprobou provisionalmente en xaneiro de 2025 o proxecto de trazado do tramo entre O Carme e Barreiros, dentro da tramitación administrativa desta infraestrutura.
Os populares tamén puxeron o foco na A-56, entre Lugo e Ourense, e sinalaron que só está operativo un treito duns oito quilómetros entre ambas as provincias, aberto en 2020. “Non hai ningún avance”, reprocharon, ao reclamar que se continúe desenvolvendo a conexión entre as dúas capitais.
Finalmente, referíronse á A-76, proxectada para comunicar Ponferrada e Ourense a través da contorna de Monforte de Lemos. Segundo expuxeron os representantes do PPdeG, actualmente existen seis quilómetros en tramitación na zona do Bierzo, mentres denunciaron que non se produciron avances equivalentes dentro da provincia lucense.
