O presidente da Asociación Provincial de Empresarios de Hostalaría de Lugo, Cheché Real, criticou que o plan de Nadal deseñado pola Xunta “non” supoña “ningún alivio” para o sector.
Real lamenta que desde marzo se repita “a mesma tónica” que, segundo indica, pasa por que todos os obxectivos en canto a restricións e limitacións se centran na hostalaría. “Entendemos que a prioridade é a sanidade, pero o punto de mira téñeno posto na hostalaría”, protestou.
O representante dos hostaleiros avisa de que “se se abre moito a man para que haxa reunións nestas festas quen vai pagar despois todos os contaxios que vaia haber vai a ser o sector da hostalaría”. “Economicamente para a hostalaría segue sendo un pau tremendo, unha circunstancia caótica”, lamentou.
Cheché Real tamén apura á Xunta para a apertura “perimetral” da cidade de Lugo e avisa das consecuencias destes tipos de peches nos aloxamentos turísticos. “Con estes peches perimetrais, o aloxamento está a sufrir as consecuencias do confinamento, aínda sen estar expresamente pechado”, subliñou.
Real asegura que a situación é “inasumible para o sector do aloxamento, que pasa por momentos delicadísimos”. “Tan delicados que grandes cadeas, grandes hoteis están pechados e non teñen ningún tipo de ingreso”, incide. “En xeral o sector está nunhas circunstancias caóticas. O primeiro trimestre de 2021 vai ser caótico” para a hostalaría, augura o empresario lucense.
