O presidente da Asociación Provincial de Empresarios de Hostalaría de Lugo (APEHL), Cheché Real, asegurou que os profesionais e empresarios deste sector van estar vixiantes para que “por catro ou cinco” que se comportan de maneira “irresponsable e incumpren as normas de prevención fronte ao Covid19 non teñan as autoridades que pechar todos os establecementos”.
En declaracións a Cope Lugo, Cheché Real informou de que a propia Xunta recoñeceu que os locais de lecer nocturno de Galicia “teñen un comportamento exquisito”. “Están absolutamente preparados e empeñados en que nos seus establecementos non se produza ningún tipo de desmán en canto ao cumprimento da normativa hixiénico sanitaria”, indicou.
Nese sentido, tamén recoñeceu en declaracións á Cope que “hai algún establecemento, que nin sequera é de lecer nocturno, que está a incumprir ese tipo de medidas”, polo que dixo que “contra eses é contra os que hai que actuar”.
De feito, dixo que non é só cousa da policía, senón que “o propio sector vai estar á espreita para evitar que por culpa de catro cinco, as autoridades sanitarias non se vexan obrigadas a pechar todos os establecementos”.
Ademais, lembrou que “os empresarios de hostalaría e os seus colaboradores tamén teñen familia” e “despois de estar con grupos de xente de todo tipo, teñen que volver ás súas casas”, de modo que para evitar riscos teñen que “cumprir escrupulosamente as medidas de prevención”.
