O presidente da Xunta e do PP de Galicia, Alberto Núñez Feijóo, dixo este luns que “todo parece indicar” que a autovía entre Santiago e Lugo, a A-54, estará finalizada non para o Xacobeo 2021 como estaba previsto, senón para o próximo, que será en 2027.
Nunha comida mitin en Melide (A Coruña), Feijóo adiantou que dirá ao próximo ministro de Fomento que “non é de recibo” que a autovía se atope agora “semiparada” despois de que o Goberno de Mariano Rajoy “a metese nos seus Orzamentos Xerais “durante a recesión económica” e deixase “todos os tramos licitados” antes do cambio na Moncloa pola moción de censura.
Ademais de atacar ao Executivo de Pedro Sánchez coa A-54, puxo o foco na situación económica “non tan optimista” que está a deixar o PSOE en España desde que goberna. “Europa acábanos de confirmar que as contas públicas empezan a ter datos de déficit non previstos”, apuntou.
Feijóo tamén fixo referencia ao superávit de Galicia en 2018, froito dunha “Comunidade solvente” e “á marxe de problemas financeiros” e do que lamentou que a Xunta “aínda non ten” a autorización do Goberno central para gastalo. No entanto, a Administración autonómica xa previu unha ferramenta legal para reducir a débeda autonómica e investir o remanente “en infraestruturas sanitarias, educativas, do Camiño de Santiago e do sector industrial e rural”.
