Natxo Lezkano, xa ex primeiro adestrador de Cafés Candelas Breogán, compareceu en rolda de prensa para despedirse despois do cese comunicado oficialmente esta mañá e trasladado ao propio Lezkano onte á noite, segundo confirmou o adestrador vasco.
Lezkano quixo “agradecer a todo o mundo” e recoñeceu sentirse “abrumado por tódalas mostras de afecto e agarimo”. Lembrou que desfrutou “moitísimo” e leva consigo “experiencias moi boas nun club grande, coma é o Breogán”. Tivo verbas de “agradecemento aos breoganistas” porque sentiuse “moi feliz na pista” e “foi unha gozada” adestrar no Pazo. “Aquí teñen un breoganista máis”, rematou na súa primeira intervención.
“Voume coa seguridade de que este club está moito mellor de cando cheguei a nivel de estrutura, de medios para xogadores e adestradores”, explicou, polo que “é un obxectivo cumprido” do que se sinte “moi satisfeito”. “Pido para o club, non para mín”, lembrou.
