O Club Deportivo Lugo perdeu contra o Málaga C.F. (2-1) despois dunha primeira metade onde se adiantou cedo cun golazo de “Josete” Malagón no minuto 8 ao aproveitar unha indecisión do porteiro Munir Mohand despois dun saque de esquina e marcar un gol á reviravolta con pouco ángulo. Na primeira parte, o equipo lucense foi superior, apenas sofreu defensivamente, tivo máis chegadas e controlou maioritariamente o xogo. O Málaga só inquedou na primeira metade nunha falta directa botada por David Lombán que desviou Juan Carlos Martín preto do primeiro pau.

Na segunda metade, o Málaga empatou no minuto 50 nunha xogada elaborada, na primeira realmente do partido por parte dos andaluces, nun centro de Federico Ricca, prolonga Gustavo Blanco Leschuk e Adrián González marcou a bocaxarro. Dous minutos despois, o Lugo tivo unha opción nun golpeo de rosca de Eduard Campabadal que marchou excesivamente lonxe. O Málaga apenas xeraba. Iso sí, no minuto 64 Miguel “Cifu” tivo un contragolpe finalizado alto. No minuto 70, “Josete” foi expulsado despois dun cruce en falta a Gustavo Blanco Leschuk. Dous minutos despois, Lombán tivo unha nova falta directa que saiu alta. E, no 79, o 2-1. Cristian Herrera perde un balón, Federico Ricca centra e Jack Harper cabeceou cruzado a gol. Dende aí, o Lugo buscou o empate. No minuto 81, saque de esquina de Antonio Campillo que cabecea Iriome González, pero Munir Mohand desviou nunha acertada intervención. E xa no desconto, Campillo lanza un novo saque de esquina, Miguel Vieira prolonga e Cristian Herrera non foi quen de rematar no segundo pau nunha xogada na que hai un posible penalti por posible man de Jack Harper.