Gerard Valentín Sancho é novo lateral dereito do Club Deportivo Lugo cedido polo Real Club Deportivo da Coruña até o 30 de xuño de 2019.
O xogador nado en Avinyonet de Puigventós (Girona), de 25 anos, pode competir tamén coma extremo dereito.
Valentín leva tempada e media no Dépor, onde apenas competiu 3 partidos de Liga e 2 de Copa a campaña pasada e un de Liga e outro de Copa no presente exercicio. Antes, xogou no Gimnàstic de Tarragona entre 2014 e 2017, as dúas últimas tempadas en LaLiga 1|2|3 xogando 12 partidos na primeira campaña e 33 encontros no seguinte exercicio na segunda categoría do fútbol español.
Destaca pola súa velocidade, profundidade por banda, capacidade para os centros laterais e as súas habilidades técnicas.
O xogador pasará mañá o recoñecemento médico e será presentado ás 13 horas no estadio Ángel Carro.
