Deporte e natureza, nado en condicións únicas. A VI Travesía a Nado do Miño Cidade de Lugo volverá a atraer a nadadores profesionais, afeccionados e curiosos á beira do río. Será este sábado 28 de xullo, nas instalacións dos Robles. A proba está organizada organizada polo Concello e o club PortaMiñá, conta ademais coa colaboración da Deputación de Lugo dentro da súa aposta decidida pola promoción do deporte así como outras entidades privadas.

Este evento, que comprende tres categorías e conta con máis de 130 inscritos, foi presentado polo concelleiro de Deportes e Medio Rural, Miguel Fernández, e o presidente do Club Natación PortaMiñá Lugo, Fernando Timiraos. A VI Travesía a Nado do Miño Cidade de Lugo terá entre os participantes a campións de España e Portugal. 

No acto de presentación, Fernández puxo en valor o compromiso do goberno local por impulsar este tipo de citas. “Non só contribúen a enxalzar unha modalidade deportiva –dixo o concelleiro–, senón que serven para dar a coñecer a nosa cidade e poñela no calendario deportivo a nivel nacional”. Enxalzou tamén a contorna privilexiada –as augas do río Miño ao seu paso por Lugo– da proba, “moi agardada polas persoas afeccionadas ano tras ano”.

O voceiro municipal lembrou o traballo que realiza o club organizador non só nesta proba, senón ao longo de toda a tempada deportiva. O presidente do PortaMiñá agradeceu o apoio do Concello e deu a coñecer os pormenores da proba.

A Travesía a Nado comezará ás 11:00 horas coa saída da propa popular, sen carácter competitivo, que abrangue unha distancia de 400 metros. Ás 11:30 horas sairán as persoas participantes da distancia de 1.500 metros, deixando para as 12:30 horas a proba raíña, a denominada, pola organización, Minivs, cunha distancia de 4000 metros, e enmarcada no circuíto galego de augas abertas, competición na que están 15 travesías galegas.