O CD Lugo anunciou este luns a destitución de Curro Torres, que foi despedido a seis xornadas do final de LaLiga SmartBank e co equipo en postos de descenso.
O conxunto galego comunicou que o seu Consello de Administración “decidiu destituír a Curro Torres unha vez analizada a situación actual” do equipo na categoría de prata. O Lugo agradécelle a Curro Torres e o seu equipo técnico “o seu traballo e dedicación, e deséxalle todo tipo de éxitos persoais e profesionais no seu futuro”.
O equipo branquivermello cambiará de adestrador por segunda vez esta tempada, na que Eloy Jiménez empezou como inquilino do banco ata a súa destitución na vixésimo primeira xornada.
Curro Torres estivo á fronte do equipo en quince encontros cun balance de catro vitorias, catro empates e sete derrotas, a última este domingo ante o Sporting de Xixón no Molinón (2-0).
O Lugo, que regresou do parón pola COVID-19 cunha vitoria ante o Racing de Santander (1-2), sumou só un punto dos últimos doce, con tres derrotas e un empate, unha dinámica que o levou a buscar un revulsivo co cambio de titularidade no banco.
