O dianteiro Mario Barco é novo xogador do Cádiz C.F. procedente do Club Deportivo Lugo. Asina por tres tempadas. Barco fichou polo Lugo en 2015, foi cedido nas dúas primeiras campañas e debutou en Segunda División no campionato precedente aportando cinco goles en 1066 minutos. O punta rioxano remataba contrato co Lugo este 30 de xuño.
Barco, de 25 anos, xogou cedido polo Club Deportivo Lugo na Unión Deportiva Somozas e no Pontevedra C.F., ambos conxuntos militaban en Segunda División B, entre 2015 e 2017 anotando 20 goles.
O dianteiro xogou previamente na U.D. Logroñés, no Bilbao Athletic e no Barakaldo C.F., en Segunda División B, categoría na que sumou 40 goles en cinco tempadas.
Mario Barco militará nun Cádiz que rematou en novena posición da Liga 1|2|3 pese a estar en posto de promoción de ascenso dende a decimosexta xornada. Comezará a pretempada o vindeiro luns 9 de xullo.
Barco, en declaracións aos medios oficiais do Cádiz C.F., afirmou que “é un paso adiante” na súa carreira e o “mellor sitio para rematar de explotar”. Subliña o “interese continuo” nos seus servizos do equipo adestrado por Álvaro Cervera e que o Cádiz ten “unha das mellores afeccións de España”.
