O Club Voleibol Emevé Lugo comunicou a renovación de Manuel Blanco, capitán do equipo masculino. O central internacional venezolano, 1.92 metros de estatura e 40 anos de idade, cumprirá a súa segunda tempada en Lugo, onde chegou procedente do Club Aldebarán San Sadurniño, onde competiu durante tres tempadas, sendo tamén adestrador entre 2015 e 2017.
Blanco proclamouse campión da Copa Príncipe co Emevé o pasado xaneiro en Leganés cando o conxunto presidido por Bibí Bouza conquistou o título por vez primeira na súa historia despois de ser subcampión en 2013 e terceiro en 2011. Blanco gañou dúas ligas venezolanas (2012 e 2015). Defendeu as cores do Uorsa Vigo no campionato 2010-2011.
Segundo o Emevé, Manuel Blanco destaca pola “súa paixón por este deporte”, o seu “gran nivel cada tempada” e os “seus valores“, polo que é “un orgullo” telo con esta camisola.
