Tras dous anos realizando de forma comunitaria os traballos de rapa e marcado dos seus animais coincidindo coa romaría de San Lourenzo, a asociación gandeira Seara Verde de Becerréa apostou este ano pola consolidación dunha rapa das bestas aberta ao público que se celebrará o sábado -8 de agosto- en Pena do Pico, na parroquia de Penamaior.
A iniciativa conta co apoio da Vicepresidencia da Deputación de Lugo, que achegou 10.000 euros para a organización das actividades previstas e para a compra e instalación dun curro móbil. As ganderías prevén realizar mañá venres os traballos de montaxe da nova estrutura metálica, na que realizarán os raballos de curo, marcaxe a frío e microchipado dos novos exemplares de Pura Raza Galega.
O sábado, coincidindo coa romería de San Lourenzo, celebrarán a rapa. Pola mañá conducirán os animais ata o curro da ermida e pola tarde, tras un xantar popular, as aloitadoras e aloitadores entrarán no curro para a rapa das bestas.
Co impulso da rapa, as ganderías de Seara Verde, que promoveron a subida deportiva popular a cabalo á romería de San Lourenzo e contribuiron ao estudo e adaptación da trazado da vía Kuning para cabalo, seguen avanzando na divulgación da cultura do cabalo e da gandería extensiva na comarca dos Ancares.
Programa
Venres 7
10.00 a 14.00 h. Montaxe do curro, marcaxe a frío e microchipado os novos exemplares PRG. Apuntarse para acudir de voluntario
Sábado 8
10. 00 h. Saída a cabalo dende o Mosteiro de Penamaior para achegar as greas ata o curro da ermida.
12.00 h. Misa na honra de San Lourenzo
12.30 h. Sesión vermú
14.00 h. Xantar popular
16.00 h. Rapa e desparasitación das bestas
