A presidenta da Deputación de Lugo, Carmela López, e a alcaldesa de Vilalba, Marta Rouco, supervisaron este venres o dispositivo preparado para o arranque do Festival Independente de Vilalba (FIV), que comeza nesta xornada. Ambas as dúas asistiron ás probas de son previas ao comezo dunha cita musical que volve contar cunha achega provincial de 50.000 euros.
Durante a visita, Carmela López destacou que o FIV “é un referente en Galicia” e subliñou que se trata de “unha aposta intelixente do Concello de Vilalba”, tanto polo seu impacto económico como pola súa capacidade de promoción turística. Neste sentido, sinalou que o festival xera un retorno estimado de ao redor de un millón de euros, ao que se suma a repercusión social derivada da contratación de subministracións, servizos e persoal local.
Pola súa banda, Marta Rouco amosou a súa confianza en que esta sexa “outra edición exitosa” dun evento que o Concello impulsa cunha achega de 120.000 euros. A alcaldesa destacou ademais a relevancia do festival desde o punto de vista turístico, ao considerar que “pon a Vilalba no mapa”.
PROGRAMACIÓN
A programación do festival arrinca este venres ás 19:30 horas coas actuacións de Carlos Ares, Celia Becks, Futuro Alcalde e Alcalá Norte. A xornada do sábado estará protagonizada pola M.O.D.A., Ángel Stanich, Puño Dragón e Repion, consolidando un cartel que atrae a milleiros de persoas cada ano á capital da Terra Chá.
