Na pasada xornada, o Club Deportivo Portomarín levou os tres puntos perante o Club Deportivo Corgo. Mais o fito máis salientable non foi a vitoria, imprescindible para manter o coliderado do grupo, senón a pancarta que despregaron os xogadores en solidaridade cos alumnos, pais e nais do CEIP Virxe da Luz. A meirande parte do equipo é natural da vila e coñece de primeira man a inseguridade pola falta de oportunidades e o despoboamento.

Á hora de escoller onde vivir, un aspecto crucial é o acceso a unha educación de calidade e en igualdade de oportunidades. Pois ben, este curso escolar comezou coa nova da supresión dun docente, sen previo aviso por parte de ningún organismo. Esta ausencia, engadida a que este ano hai un estudante máis no Virxe da Luz, conlevou a agrupación dos alumnos de Primaria en dous grupos: un de primeiro a terceiro, e outro de cuarto a sexto. Un inconvinte enorme, polas diferenzas nos contidos e nos ritmos das diferentes idades.

De inmediato, a Asociación de Nais e Pais do colexio procedeu a reunirse co alcalde, Juan Serrano, a directora do centro e os delegados do servizo territorial da Inspección Educativa. Porén, as xuntanzas foron infrutuosas, ata o punto de que no último encontro negouse o acceso ao rexedor de Portomarín, que tivo que agardar na entrada do Virxe da Luz. O veto foi decisión do inspector, tal e como explican dende a ANPA, pois contaban con que estaría presente.

A falta de solucións por parte da Consellería de Educación recibirá unha queixa ante a Valedora do Pobo. Pais e nais emprenderán mobilizacións e animan a outros colexios a realizar accións conxuntas. Entenden que esta problemática é cada vez máis habitual no rural, e que sen vontade do goberno autonómico, a incerteza afondará no despoboamento.