A pesar de que a denuncia inicial foi arquivada en marzo, o éxito do recurso das asociacións a prol do medio ambiente obriga ao Xulgado de Instrucción número 8 de Ponferrada a continuar a investigación sobre os incendios da Tebaida berciana de abril de 2017. A pescuda ten a súa cerna nunha familia de gandeiros que se beneficiou dos consecutivos lumes das lindes do Val do Silencio, paraxe de incalculable importancia ecolóxica, Ben de Interese Cultural, e que aspira a ser Patrimonio da Humanidade.
Este xiro é celebrado polos impulsores do recurso, Asociación Forestal de León e Bierzo Aire Limpio, coma un punto de inflexión contra a impunidade dos incenciarios. A Audiencia Provincial de León ordea levantar o sobresemento provisional –en contra do fiscal, que solicitara o arquivo– e continuar as dilixencias para esclarecer os feitos, acordando oportuno incluír na investigación o irmán do gandeiro de Bouzas que xa fora interrogado, pois os lumes coincidiron coa súa presenza no pobo.
A ampliación da actuación da brigada científica ten en conta os testemuños dos veciños da zona afectada polos incendios dos días 17 e 18 de abril de 2017. A Audiencia Provincial de León sinala que a declaración dos axentes de Medio Ambiente amosa que o principal beneficiario das lapas de Tebaida son as persoas con intereses gandeiros, coma xa amosara a asociación Tyto Alba na denuncia orixinal.
Malia que expresa prudencia, o escrito dos tres maxistrados incide en tres circunstancias: o val representa un recurso de pasto para a familia gandeira investigada, os incendios son constantes un ano tras outro, e sempre con orixe na mesma zona. A estes indicios engádese que o gandeiro investigado en primeiro lugar, identificado polas forzas da orde en maio de 2017, negouse a explicar o seu paradeiro; e aínda que o seu posicionamento móbil é inconcluínte, non descarta o emprego de redardadores do lume.
A importancia do desastre de Tebaida vai alén das 1.300 hectáreas arrasadas polos incendios provocados, que a piques estiveron de afectar a varios núcleos de poboación. Trátase dun lugar de alto valor ecolóxico, con bosque autóctono de carballos e piñeiros que tardará en volver a medrar. Do lado positivo, si o fixeron xa carqueixas e queiroas. E puido salvarse o importante patrimonio histórico da localidade berciana, zona de culto durante o medievo.
Esta importancia patrimonial está determinada pola existencia de despoboados vencellados á actividade clerical. A área de Tebaida inclúe o mosteiro de San Pedro de Montes e a Igrexa Peñalba de Santiago, amais de tres despoboados rexistrados, de entre os séculos X e XIII. E, coma se dun milagre se tratase, o lume e mailos traballos de limpeza revelaron quilómetros de muros de contención correspondentes a trinta parcelas de cultivo, seis camiños, tres fontes e dous edificios; un conxunto vencellado cos despoboados de Santa Eucheria e Santa María de Castrillo.
