A Vicepresidencia da Deputación de Lugo comeza este luns cos obradoiros do programa IlustrarNÓS, que chegarán a 14 centros con distintas actividades relacionadas co mundo da ilustración, deseño e artes gráficas.
Nos centros de educación primaria realizarase un obradoiro dunha hora de duración baixo o título “Os Nosos (Ilustres) Instrumentos”, nunha proposta que conxuga ilustración e música e que correrá a cargo da ilustradora Laura Romero e do músico Juan A. Álvarez.
Os CEIP de Albeiros, de Paradai e Quiroga Ballesteros, de Lugo cidade, desfrutarán da actividade este luns. Ao CPI Ramón Piñeiro, de Láncara, e ao CEIP Virxe do Carme de Sober, chegará o vindeiro 21 de marzo. Nos concellos mariñaos de Barreiros e Foz tamén se desenvolverá este obradoiro, en concreto nos CEIP San Cosme e Fondo Nois, o 25 de abril. Ao día seguinte, o 26 de abril, terá lugar no CEIP O Salvador, da Pastoriza, e no CEIP Plurilingüe, na Pontenova. Finalizarase o ciclo no CPI de Cervantes o 27 de abril.
Nos centros de secundaria, os obradoiros correrán da conta do historietista e ilustrador Kiko da Silva, que debullará para o alumnado o proceso creativo da banda deseñada. Realizaranse no IES Río Cabe de Monforte o 25 de marzo, e o 22 de abril no CPI Dr. López Suárez de Friol e no IES Pedregal de Irimia de Meira.
Ademais, a Escola de Arte Superior de Deseño Ramón Falcón de Lugo, que imparte diversos módulos relacionados coa ilustración, acollerá o 6 de maio unha charla a cargo do ilustrador Alberto Guitián, que afondará en cuestións relativas ao exercicio profesional, poñendo sobre a mesa temas como a protección e a xestión dos dereitos de autor no mercado global ou a defensa fronte a plaxios ou prácticas especulativas.
A vicepresidenta da Deputación de Lugo, Maite Ferreiro, agradeceu “a boa acollida que o programa tivo entre os centros educativos, que demostraron un gran interese por incluír estas actividades nas aulas, fomentando que o alumnado coñeza e valore o traballo nosas creadoras e creadores, neste caso no ámbito da ilustración”.
II CERTAME DE ILUSTRACIÓN “ILUSTRARNÓS”
O programa inclúe a convocatoria do II Certame de Ilustración “IlustrarNÓS”, dirixido a fomentar a creatividade e as artes gráficas nos centros de ensino e aberto a alumnado de Primaria, Secundaria, BAC e Ciclos Formativos de Grao Medio e Superior.
Establéncense catro categorías de creación, en función das etapas educativas, cos seus correspondentes premios. As bases e as follas de inscrición, que foron remitidas a todos os centros educativos, están tamén disponibles en cultura.deputacionlugo.gal
INTERVENCIÓNS ARTÍSTICAS
A axenda de IlustrarNÓS completarase co pintado de oito murais en instalacións e recintos educativos, realizados por Iago Eireos e Iván Mouronte e con deseños alusivos a Reimundo Patiño, pintor e pioneiro da Banda Deseñada en Galiza, a quen se dedicou este ano o Día da Ilustración.
Ademais, ao longo da primavera, o ilustrador Kiko da Silva realizará unha exhibición do seu traballo na Praza de Marcos.
