O ‘Proxecto Lorca’ xa pariu as cancións que varios músicos e grupos lucenses crearon sobre a obra Seis poemas galegos, do escritor Federico García Lorca. As pezas xa están dispoñibles para a súa escoita en Youtube e Spotify.

A iniciativa, impulsada pola área de Cultura da Deputación e a área de Cultura da USC no Campus de Lugo, contou coa colaboración de Abrigueiro Estudio para a gravación e produción dos temas, que xa se estrearon o pasado mes de decembro nun concerto na Casa do Saber.

Así pois, Noelia Geada e David Taboada musicaron ‘Cantiga do neno da tenda’; o grupo Nebra puxo música a ‘Danza da lúa en Santiago’; a banda indie Infrarroja, a ‘Romaxe da Nosa Señora da Barca’; os músicos Quique Muruáis e Luis Monsalve compuxeron sobre ‘Noiturnio do adoescente morto’; mentres que o dúo Condensadores de Fluzo acompañaron os versos de ‘Canzón de cuna pra Rosalía de Castro, morta’.

O repertorio complétase con ‘Chove en Santiago’, unha melodía de Carlos Díaz para  o poema ‘Madrigal á cibdá de Santiago’, composta xa en 2015 pero rexistrada agora por primeira vez para a súa difusión.

A vicepresidenta provincial, Maite Ferreiro, explicou que con este proxecto prolóngase a lembranza da primeira visita realizada por Lorca a Galicia e “ponse en valor o traballo de creadores lucenses que asumiron o reto de poñer música por primeira vez a cinco das seis composicións” do poemario.