Inmersas nunha continua busca de actividades e propostas de ocio nas que pasarmos o tempo nas nosas casas, chega a Lugo unha alternativa interesante. O Concello lanza un certame de curtametraxes dirixido á mocidade para promover a creatividade e imaxinación durante o confinamento.

No concurso, impulsado pola área da Xuventude, poderán participar mozas e  mozos de entre 14 e 35 anos empadroados en Lugo, que estuden ou traballen neste municipio. Deberán presentar curtas que foran rodadas no interior do domicilio, coa axuda de calquera dispositivo, e que teñan un máximo de 1 minuto de duración.

“O que se pretende con esta iniciativa é animar á poboación xuvenil e dar opcións para que aproveiten as horas na casa realizando actividades que lles gusten ao tempo que desenvolven dotes artísticas”, explica Ana González Abelleira, responsable da área de Muller, Igualdade e Xuventude.

REQUISITOS, PRAZO E PREMIOS

As pezas, que deberán ser orixinais e inéditas, deberán levar canda si un título e, no caso de non empregar a lingua galega, é obrigatorio que teña subtítulos. O prazo de presentación vence ás 21:00 horas do domingo 10 de maio.

Respecto dos premios, contémplase un por categoría (hai tres, por grupos de idade) e estarán baseados en experiencias de aventura. Un tribunal formado por tres membros do eido cultural e audiovisual do municipio decidirá a proposta gañadora tendo en conta a calidade artística das obras, a orixinalidade e/ou imaxinación, así como o feito de abordar temas que enxalcen a solidariedade humana e a súa capacidade de supervivencia ante dificultades.

As bases completas poden consultarse na web do Concello de Lugo.