O festival de música FIV de Vilalba deu a coñecer durante este martes as primeiras confirmacións para a vindeira edición, que se celebrará o 24 e 25 de abril. Zahara, Novedades Carminha ou Xoel López son algúns dos artistas que estarán no cartel deste ano. Este último presentará en directo ‘Alma de oro’, o adianto do seu novo disco.
Este evento de música indie tamén traerá á Terra Chá a psicodelia de Magical Colours, grupo de rock e folk norteamericano; os sons tropicais e o merengue do galego Ortiga; ou o baile da man de Begun DJ Set.
Os abonos poden conseguirse na web do FIV de Vilalba ou en ataquilla.com, pero a venda xa comezara o pasado 10 de febreiro malia non coñecerse daquela ningún nome do cartel. Actualmente, ofrécese unha quinta cota de entradas por un prezo de 33 euros mais gastos.
