O Concello de Xermade e a asociación de veciños de Cabreiros, en colaboración coa Universidade de Santiago de Compostela (USC) fixeron público o fallo da cuarta edición do premio ‘Xermade na Historia’. O galardón, dotado con 2.000 euros, recaeu en Xavier Gómez Vila e Antonio Riveira Requeijo, autores da obra‘Xermade na Prehistoria. A paisaxe arqueolóxica no paleolítico, megalitismo e calcolítico’.
María José Rodríguez García, que presentou ao concurso ‘Patrimonio artístico-relixioso do Concello de Xermade: igrexas, capelas e ermidas’, obtivo o segundo premio, valorado en 1.000 euros.
O xurado estivo formado polo presidente do Consello da Cultura Galega e Catedrático de Historia Contemporánea Ramón Villares, natural de Cazás; polo escritor e técnico do Museo Provincial de Lugo Antonio Reigosa; por Manuel Souto, presidente da Asociación de Estudos Históricos e Sociais HUME deAs Pontes, e polo alcalde, Roberto García Pernas.
UN TRABALLO “COMPLETO E DIDÁCTICO”
Os expertos do xurado valoraron a investigación gañadora como “un traballo completo e de doada lectura”, que ten un ton “didáctico”. Os premiados recibirán os seus galardóns durante a celebración da décimo cuarta edición das Xornadas Interxeneracionais de Cabreiros.
