A xunta de goberno do Concello de Lugo aprobou este mércores a contratación con 270.000 euros do patrocinio publicitario do Caudal Fest, o festival musical que se celebra onda o Miño o 20 e 21 de setembro.
O importe do mesmo ascende a 270.000 euros e permitirá promocionar a marca do municipio de Lugo no ámbito provincial, galego e estatal e internacional. Por parte do Concello aseguraron que o importe “se basea no informe xustificativo da rendibilidade do plan de medios do Caudal Fest, elaborado por unha empresa externa”.
A obxectivo da área de Desenvolvemento Local céntrase en “impulsar a dinamización cultural e económica do municipio despois de que na primeira edición do evento achegase un retorno de máis de tres millóns de euros para a cidade, cunha ocupación hoteleira do 100% e do 90% nas localidades lindeiras”.
As estimacións para este ano son boas, posto que xa se venderon máis do 80% das entradas. Ademais, o portavoz socialista do goberno local, Miguel Fernández, destacou que se trata dun evento e un escaparate que pon a Lugo “como marca a nivel estatal e internacional”.
