A Deputación de Lugo colaborará coa Fundación TerrEo, impulsada polo Concello de Ribeira de Piquín para favorecer o dinamismo económico e a creación de emprego no rural, a través dunha achega de 100.000 euros en catro anualidades, entre 2023 e 2027. Así o acordou a xunta de goberno provincial e o avanzou a portavoz socialista, Pilar García, quen lembrou que a institución provincial xa coopera con esta fundación para o funcionamento da piscifactoría de Santalla, xunto cun polígono agroecolóxico e unha explotación de ‘porco celta’.
“Comprometémonos con esta iniciativa porque concorda co modelo de desenvolvemento rural que defendemos na Deputación”, pois aproveita “os enormes recursos e potencial que temos na provincia para crear riqueza e emprego e, por tanto, contribúe a fixar poboación“, explicou García Porto.
A maiores, a xunta de goberno acordou achegar 27.000 euros ao Concello de Vilalba para a organización das festas patronais de San Ramón e Santa María, que serán do 23 de agosto ao 3 de setembro. A portavoz destacou que estas celebracións supoñen “un auténtico revulsivo económico” para a vila, “sobre todo no sector da hostalaría, do comercio e do turismo”.
OUTRAS ACTUACIÓNS
Ademais, a Deputación deu ‘luz verde’ á solicitude de Barreiros para destinar 34.700 euros de remanentes do Plan Único 2023 para rexenerar accesos a seis recintos de festas: Cabarcos, Matomaior, Sante, Romiña-O Barreiro, Vilar e Proida-Camiño Real.
De igual modo, o Concello de Guitiriz poderá destinar á pavimentación da rúa da Soidade 12.200 euros de remanentes dunhas obras que foron financiadas polo goberno provincial para acondicionar un paseo peonil na rúa Manuel María. Por outra banda, a Deputación pagará unha subvención de 6.000 euros á mancomunidade de montes de Santa Cruz e Capela de Ove, en Ribadeo, para equipamento do seu local social.
