Un gromo orixinado posiblemente nunha voda celebrada o pasado fin de semana na cidade de Lugo deixou polo menos 43 positivos por covid-19 ata en tres municipios, A Pastoriza, Meira e Castro de Rei.
Segundo confirmaron fontes do Sergas a Europa Press, polo momento detectáronse 43 casos de coronavirus asociados a este foco de contaxios que permanecen en seguimento nos seus domicilios, mentres outras 110 persoas permanecen en corentena.
A este respecto, o alcalde da Pastoriza, Primitivo Iglesias, asegurou que a situación se atopa “normalizada”, tal e como subliñou que estaba “ata hai pouco”, “con certa tranquilidade e normalidade”. No entanto, recoñeceu que os focos que “aparecen de súpeto” causan “intranquilidade” e “desconfianza” respecto dunha saída desta “pandemia que tanto dano provoca”.
En concreto, Primitivo Iglesias explicou que o noivo da voda na que poderían producirse os contagios reside nunha parroquia da Pastoriza. Con todo, matizou que “aínda que ía e viña” a casa dos seus pais, “facía máis vida en Meira”, onde conta cun establecemento comercial.
Así mesmo, o alcalde atribuíu esta situación á “mala sorte” de que un evento “tan importante como é unha voda” e que “se celebra con tanta expectativa e alegría” se converta nun foco de contaxios. “Espero que sexa un accidente pasaxeiro”, confiou o rexedor.
