Os servizos sanitarios de urxencia trasladaron esta mañá a un ciclista que sufriu lesións graves despois de ser alcanzado por un vehículo na Fonsagrada.

Segundo informou a Axencia Galega de Emerxencias (Axega), o suceso aconteceu pouco antes das oito desta mañá, cando o condutor dun vehículo se puxo en contacto co 112 Galicia para pedir asistencia médica urxente para un ciclista que acababa de atropelar.

Así, o persoal do Centro Integrado de Atención ás Emerxencias de Galicia avisou aos profesionais sanitarios, axentes da Garda Civil de Tráfico e voluntarios de Protección Civil, que foron desprazados ata a LU-701, preto do límite con Asturias.

Tras recibir os primeiros auxilios no lugar do accidente, o ciclista foi evacuado, inicialmente, ao Punto de Atención Continuada da Fonsagrada.