O Colectivo Fala Ceibe do Bierzo, constituída en defensa do galego na CCAA de Castela e León, vén de expresar unha serie de demandas orientas aos distintos partidos políticos que concorrerán ás eleccións autonómicas da Comunidade este vindeiro 13 de febreiro. Entre elas destaca a oficialidade do galego, para a que piden unha reforma do Estatuto castelán-leonés.

Asimesmo, demandan a cooficialidade concreta do idioma na zona do Bierzo e a constitución dun “Servizo lingüístico comarcal”. A estas peticións únese que os concellos bercianos teñan tamén a súa denominación en lingua galega. Máis alá do galego, esixen unha aprobación polas cortes rexionais da Lei de linguas minorizadas de Castela e
León, co obxectivo de que esta “protexa e fomente” tamén o leonés e o eusquera, este último no enclave de Treviño.

De volta na cuestión galega, destacan tamén as petición de que a Xunta castelán-leonesa “obrigue á oferta da materia de lingua galega en todos os centros públicos do Bierzo ocidental, para que o seu alunado poida exercer o seu dereito de eleción do galego voluntario”. Explican, a este respecto, que na actualidade “non se oferta galego nos colexios da Veiga de Valcarce, Quilous, Carracedelo, Fabeiro” e máis. Demandan tamén que a Consejería de Cultura da Junta de Cyl subministre libros en galego nos
centros escolares e bibliotecas municipais do Bierzo occidental e que se
garanta o aceso a internet desde cibercentros rurais para “manter o contacto
dixital co idioma galego”.