Como conmemoración do Bicentenario da creación provincial do Bierzo á vez que como reividicación do mantemento da liña rexional Ponferrada- Vigo, o colectivo cultural Fala Ceibe do Bierzo organiza unha viaxe en tren este sábado 24 de xullo ata O Barco de Valdeorras. Trátase, segundo indica o colectivo, de “dar a coñecer aos bercianos e ás bercianas a próxima comarca galega e promocionar a celebración provincial mediante este peculiar irmandamento turístico”. A saída en tren está prevista para este sábado 24, ás 6.15 horas dende a estación ferroviaria de Ponferrada.
Segundo explican dende o colectivo, toda a viaxe contará cun guía turístico que ofrecerá as “oportunas” explicacións históricas aos viaxeiros durante o percorrido. Unha vez finalizada a travesía, que durará 45 minutos, os participantes subirán a pé á vila do Castro. Despois baixarán cara Viloira e de volta ao Barco pasearán polo casco antigo ata a Casa do Concello e percorrerán o Malecón. O tren rexional partirá ás 18.45 horas con dirección a Ponferrada.
