A Deputación de Lugo interésase polas demandas sociais e políticas do Bierzo e así o fai saber ao anunciar que participará e colaborará na celebración do bicentenario do Bierzo como provincia. Farano a través de “propostas” que axuden “a visibilizar a historia compartida entre os dous territorios administrativos”.
A vicepresidenta provincial, Maite Ferreiro, acompañada polo deputado de Deportes, Artesanía e Memoria Histórica, Efrén Castro, recibiron en San Marcos ao portavoz de Coalición polo Bierzo e membro do Consello Comarcal do Bierzo, Iván Alonso, e ao vogal da Secretaría de Organización desa formación, Javier Martínez.
A vicepresidenta explicou que foi “unha primeira toma de contacto, para poñer en común aquelas cuestións nas que Galicia, e especificamente os municipios da Montaña lucense, e o Bierzo teñen intereses compartidos, tanto en materia cultural como económica e social”.
“Os representantes de Coalición polo Bierzo tamén nos trasladaron a vontade de abrir un proceso de diálogo que explore as opcións de encaixe territorial do Bierzo no contexto do Estado, partindo do seu recoñecemento como provincia”, explicou.
Trátase, dixo Ferreiro, dunha “demanda recollida por diferentes movementos políticos e sociais bercianos nasúltimas catro décadas, que o BNG trasladou a través dunha proposición non de lei ao Parlamento de Galicia”.
