InicioMedioambiente e PatrimonioComeza o procedemento para declarar BIC o Castro de Santa María de...

Comeza o procedemento para declarar BIC o Castro de Santa María de Cervantes

Patrimonio cataloga as minas da Viña da Moura e do Ribadón, a igrexa de Santa María do Castro, a casa reitoral e a Cea do Río

PUBLICADA O

- Advertisement -

A Xunta de Galicia aceptou iniciar o procedemento para declarar Ben de Interese Cultural (BIC), a petición dos colectivos locais, o Castro de Santa María de Cervantes. Asemade, inclúe os seus elementos integrantes como bens inmobles do Catálogo do Patrimonio Cultural de Galicia. Así o recolle o Diario Oficial de Galicia.

Os bens incluídos son os xacementos arqueolóxicos coñecidos como as minas romanas da Viña da Moura e do Ribadón; a igrexa de Santa María do Castro, a casa reitoral de Santa María do Castro e a Cea do Río.

A superficie que ocupa a zona arqueolóxica proposta é de 56.615 metros cadrados, e a do seu contorno de protección, é de 566.385 metros cadrados. Un conxunto que en termos cronolóxicos abrangue desde o século I d.C. ata a actualidade.

Non é a primeira vez que o castro de Santa María é proposto para acadar a categoría de Ben de Interese Cultural (BIC). A finais da década pasada, a Dirección Xeral de Patrimonio Cultural iniciou o procedemento correspondente, canda a outros dezaoito asentamentos. Mais aquel expediente quedou esquecido e agora son os colectivos da vila, nomeadamente Patrimonio dos Ancares e a ANPA do CPI Cervantes, os que lideran a reivindicación.

O xacemento

Castro de Santa María, en Cervantes | Colectivo Patrimonio dos Ancares
Castro de Santa María, en Cervantes | Colectivo Patrimonio dos Ancares

Ademais de valorizar o patrimonio histórico para evitar o despoboamento en Cervantes, hai interese por completar o estudo do castro de Santa María, o único parcialmente escavado dos 140 existentes na comarca dos Ancares.

Devandito asentamento está considerado un dos activos patrimoniais de meirande relevancia histórica, clave na formación da identidade do lugar. Sobre o castro de Santa María, situado á beira do Quindous, érguense a igrexa parroquial de orixe románica, o cemiterio baixomedieval –contabilízanse cincuenta e seis tumbas antropomorfas, moitas con restos óseos–, e a casa reitoral.

Diversas intervencións arqueolóxicas parciais (1995, 1996 e 1999) acharon, entre outros vestixios, vinte e seis construccións domésticas separadas por pequenas rúas, algunhas en lousa, canles e desaugadoiros, escadas e despensas de pedra. Varias vivendas constan dun piso principal e un faiado. Outros restos etnográficos commprenden muíños de man, moedas romanas, follas de coitelo, anacos cerámicos, machados e cravos.

Como explican dende o Colectivo Patrimonio dos Ancares, o castro de Santa María foi habitado entre o ano 50 a. C. e o século II d. C., no período de transición do mundo prerromano ao romano. A importancia do xacemento reside en que forma parte da cunca do río Navia, rica en recursos auríferos, o que explica por que foi ocupado polos romanos. Nun radio inferior a un quilómetro hai varios sitios arqueolóxicos vencellados, entre outros sete explotacións mineiras e o asentamento de Castrillón.

A limpeza levada a cabo en 2009 reflicte o interese científico do asentamento castrexo, apenas explorado nun 25 por cento. O castro de Santa María pode achegar datos sobre a transición das culturas prerromanas e a historia da minaría. Por outra banda, atópase nun territorio virxe, a Reserva da Biosfera dos Ancares Lucenses, clasificado Zona de Especial Conservación, Zona de Especial Protección para as Aves (ZEPA) e Zona de Protección do Oso Pardo.

A incoación para declarar este conxunto como Ben de Interese Cultural implica a aplicación dun réxime de protección e tutela, polo que a súa utilización quedará subordinada a que non se poñan en perigo os valores que aconsellan a súa conservación.

ÚLTIMAS

Ofertan 100 prazas para labores de panadaría nunha compañía do sector da alimentación de Lugo

Adecco publicou este mércores unha oferta de emprego de 100 prazas para labores de panadaría nunha compañía...

Dous cabalos soltos en pleno centro de Lugo

A Policía Local de Lugo informou de que, o pasado 28 de marzo, localizou na Avenida...

Ferido un neno despois de ser atropelado en Baralla ao baixar do autobús escolar

Un neno resultou ferido este xoves ao sufrir un atropelo en Baralla. Segundo informou...

Anunciado o traspaso das parcelas para a nova Comisaría de Policía Nacional en Lugo

O delegado do Goberno en Galicia, Pedro Blanco, e o alcalde de Lugo, Miguel...