Este próximo martes continuarán as concentracións da comunidade educativa do IES de Becerreá. Profesores, alumnos, pais e nais, sindicatos, a parlamentaria do BNG Carme Aira e veciños de Becerreá e de Cervantes protestarán, este trimestre cada 15 días, contra a supresión dalgúns grupos da materia de Francés no centro.
Segundo destaca o profesor Antón Pérez, integrante da coordinadora das mobilizacións do centro, a problemática foi xa tratada no Concello de Becerreá, na Deputación de Lugo e no Parlamento de Galicia (no pleno e na comisión de Educación). Contra a normativa da Consellería de Educación segundo a cal nos centros do ámbito rural non se impartirán as materias optativas da ESO con menos de 5 alumnos/as e aquelas entre 5 e 10 deberán pedir autorización, o centro responderá vestindo algunha prenda negra e concentrándose a partir das 11:40 h diante do IES.
Dende a coordinadora das mobilizacións do centro sinalan que ademais, tal e como expresa a normativa da Xunta, tampouco se impartirían con menos de 5 alumnos/as as materias troncais de opción do bacharelato (Xeografía, Economía, Física…), derivando o alumnado ás ensinanzas a distancia ou a outro centro. “Normativas semellantes lévanse promulgando hai anos, pero xamais se puxeron en práctica… ata este curso, no que se suprimiu a materia de Francés de 3o e 4o da ESO e de BAC“, censuran.
A coordinadora explica o “lesiva que pode ser esta normativa” nun centro pequeno, como é o caso, nos que algún curso a matrícula é de 14 alumnos/as. Se os alumnos/as teñen que elixir entre por exemplo, Economía e Bioloxía, e 10 alumnos/as elixen a primeira optativa e só 4 a segunda, impediríaselles cursar Bioloxía a eses catro alumnos. Isto suporía que os/as alumnos/as que quixesen ter unha preparación cun mínimo de garantías de cara a ABAU e ao Bacharelato terían que marchar a estudar fóra de Becerreá. “Se por unha banda diminúe o alumnado por ter que estudar fóra e pola outra suprimen as optativas de menos de 5 alumnos/as, en poucos anos é posible que deixe de haber bacharelato nos Ancares, unha das comarcas máis extensas de Galicia“, censuran.
