EFE | A circulación na A-6 quedou restablecida a iso das 13:00 horas en sentido A Coruña, despois de permanecer cortada desde as 04:30 horas como consecuencia dun aparatoso accidente de tráfico en Baralla, onde un camión frigorífico saíu da vía e quedou envorcado sobre a calzada.
Segundo informaron a EFE fontes do 112, o accidente produciuse poucos minutos despois das catro da pasada madrugada, concretamente á altura do quilómetro 471 da A6 onde, por causas que aínda se descoñecen, o condutor do camión perdeu o control do vehículo, que se saíu da vía e acabou envorcando.
Durante case nove horas a autovía permaneceu cortada nese punto, como consecuencia dos traballos para retirar o camión e a carga, así como para deixar limpa a calzada, pero a Garda Civil habilitou un desvío alternativo a través da Nacional VI, concretamente á altura do quilómetro 469.
O condutor, un home de 43 anos de idade, con iniciais O.C.G, resultou ferido e foi trasladado nunha ambulancia de Soporte Vital Básico do 061 ao Hospital Universitario Lucus Augusti ( HULA). O 061 chegou a mobilizar dúas ambulancias para asistir ás posibles vítimas do accidente, así como ao persoal médico do PAC do Corgo.
