A tecnoloxía e innovación lucense saltan fronteiras. É o exemplo de iBoneLab, unha empresa que comeza a ter proxección internacional grazas a que testa e avalia a biocompatibilidade de materiais en tecidos vivos, especialmente tecidos duros, ademais de analizar a resposta destes fronte aos novos elementos hospedados.
Para acadar este obxectivo, a nova spin-off do Campus de Lugo da USC céntrase no procesado histolóxico de mostras seguindo a técnica coñecida como de “lámina delgada”, unha metodoloxía que permite visualizar os tecidos e os materiais implantados a expensas da súa dureza.
A tecnoloxía de imaxe microscópica, unida á xa dilatada experiencia acumulada polo seu
persoal, permite asemade a iBoneLab analizar a interacción dos distintos compoñentes
das mostras e proporcionar así información veraz sobre o comportamento dos tecidos
vivos ante os materiais implantados neles.
Outra das vantaxes competitivas que presenta iBoneLab está estreitamente relacionada
coa súa experiencia na realización e avaliación de estudos de microtomografía computerizada. Ademais destas prestacións de carácter pioneiro, iBoneLab concentra nunha única empresa todos os pasos da investigación en integración de materiais, desde o
asesoramento técnico e a prestación de axuda á formulación da idea ata a entrega de resultados.
Constituída como empresa de base tecnolóxica a finais de 2019 a iniciativa de Antonio
González Cantalapiedra, Mónica López Peña, Fernando Muñoz Guzón e María Permuy
Mendaña, iBoneLab agrega os coñecementos e experiencias adquiridas durante máis de
20 anos por estes catro membros do Departamento de Anatomía, Produción Animal e
Ciencias Clínicas Veterinarias da USC.
Ofrece os seus servizos a clientes nacionais e tamén de fóra de España, sobre todo en Canadá, Israel, Noruega ou, entre outros, Suiza, sinalan.
