Galicia contabiliza 59 municipios nos que non se rexistrou ningún caso de Covid-19 nas últimas dúas semanas. A gran maioría (40) pertencen a Ourense, pero Lugo sitúase como a segunda provincia con máis concellos libres de coronavirus neste período. Dentro dela, a comarca da Montaña é a que mellor resiste á entrada da Covid.
En concreto, son catorce concellos os que non detectaron ningún caso nestas semanas; isto é, o 20,9% das localidades que compoñen a provincia. Trátase de Cervantes, Folgoso do Courel, A Fonsagrada, Navia de Suarna, Negueira de Muñiz, As Nogais, Ourol, Pedrafita do Cebreiro, Ribeira de Piquín, O Saviñao, Sober, Trabada, Triacastela e O Vicedo.
Baleira, Muras, O Páramo, Portomarín e Riotorto saen desta listaxe —na que figuraban hai unha semana— porque rexistraron polo menos un positivo novo nos últimos 14 días.
