O Boletín Oficial do Estado (BOE) vén de someter a exposición pública un novo proxecto de parque eólico promovido pola empresa Greenalia e que contempla a instalación de 19 muíños de vento de 180 metros de altura sobre a comparca dos Ancares. En concreto, o parque afectaría os concellos de Triacastela, As Nogais, Becerreá, Baralla, Baleira e Pol.
Entre a información que recolle o BOE destácase que o proxecto, chamado Parque Eólico Levante, contará cunha potencia eléctrica bruta de 106,4 MW e de 5.600 kW de potencia nominal unitaria. A instalación dos aeroxeradores virá acompañada da construción dunha rede subterránea de media tensión de evacuación de 30kV, dunha subestación colectiva SET e dunha liña de alta tensión a 132 kV que conectará coa colectora do parque eólico de Ventisca.
O proxecto ten un orzamento de 111.324.279,58 euros, e segundo tamén recolle o BOE, existe un tramo no que a liña de tensión eléctrica será subterránea e non áerea xa que atravesa unha etapa do Camiño de Santiago. Desde este sábado ábrese o prazo de 30 días hábiles en que calquera persoa ou colectivo pode presentar alegacións contra o proxecto.
