Como consecuencia da espectacular colisión entre dous coches, os servizos de emerxencias tiveron que atender na noite do venres a tres persoas en Antas de Ulla. O impacto foi de tal magnitude que obrigou á intervención dos Bombeiros de Chantada, responsables de excarcerar a un home de certa idade atrapado no vehículo que conducía.

O accidente sucedeu na estrada que une o Pazo de Vilane e o Castro de Amarante, no termo municipal de Antas, arredor das 21.45 horas, segundo informou a Axencia Galega de Emerxencias. Coordinados polo persoal do 112 Galicia, recibiron aviso as urxencias sanitarias do 061, a Garda Civil de Tráfico, os Bombeiros de Chantada e o GES de Monterroso.

Malia a preocupación pola persoa excarcerada, que recibiu o peor do impacto, a vida dos afectados non corre perigo. As causas do choque non están claras, pois a pesar da escuridade tratábase dun treito recto sen problemas de visibilidade ou especial dificultade para a conducción.