Unha veciña de Antas de Ulla lanza unha recollida de fondos por internet para reconstruír a súa casa que foi arrasada por un incendio. Este exemplo de crowfunding que chama á solidariedade dos galegos vén da man de Xoana Nogueira, unha muller que, o pasado 24 de outubro, tivo que ver como a súa casa ardía por mor dun problema na cheminea de leña.
“Os bombeiros non puideron chegar a tempo, non puidemos salvar nada, nin un álbum de fotos”, destaca a muller, que engade que o lume levou por diante “toda a nosa roupa, os mobles, toda a biblioteca de libros, e moitas cousas máis que aínda nos imos acordando tras o paso dos días”, explica a muller, que vén de lanzar a campaña na plataforma GoFundMe.
Na campaña Nogueira sinala que cando chegaron os bombeiros xa non puideron facer máis nada que evitar que o lume non se estendese por todo o bosque; “da nosa casa non quedou nin unha parede, non tiñamos seguro de ningún tipo xa que ao ser unha casa de madeira os seguros botábanse para atrás”, agrega.
A reconstrución da casa para a que pide solidariedade ten tamén un compoñente emocional. “Hai vinte anos que meu pai construíu esa preciosa casa, (o meu pai morreu hai 7 anos) son moitos recordos, moitos momentos, os meus irmáns naceron nesa casa, eu vivín aí toda a miña vida ata o de agora, era o noso fogar, e o das nosas mascotas”, argumenta.
De momento a súa familia atópase vivindo nun hotel pagado polo Concello, e un veciño cedeulles a súa casa mentres empezan a reconstruír a súa vivenda. “Agradecemos de todo corazón calquera achega que poidades facer por pequena que sexa ou compartir esta publicación para que poida chegar a máis xente, resúltanos moi difícil facer isto, pero estamos nunha situación desesperada”, sentencia a autora da campaña.
