O xerente da área sanitaria de Lugo, A Mariña e Monforte de Lemos, Ramón Ares, destacou de que as idades dos pacientes ingresados na provincia como consecuencia de procesos “graves por mor de infeccións por Covid-19 son cada vez máis baixas”.

“O que estamos a observar”, precisou en declaracións a Cope Lugo, “é que as idades dos pacientes ingresados”, tanto as unidades de hospitalización como nas de “críticos, son cada vez máis baixas”. Segundo Ares, esa situación é unha consecuencia directa, “un efecto fundamental, da vacina”, porque as persoas maiores xa están nunha porcentaxe elevada inmunizadas e “os procesos máis graves prodúcense nos grupos que están aínda sen vacinar”.

Ramón Ares aclarou que esas reaccións máis adversas están a producirse mesmo “en xente non que tiña patoloxías previas”. Así, recoñeceu que hai persoas que pasan “directamente da porta de urxencias ás unidades de coidados intensivos”. Nese sentido, insistiu na importancia de manter as medidas de seguridade xa coñecidas para evitar os contaxios, á espera de quede completada a campaña de vacinación.