Os contaxios diarios por coronavirus detectados na área de Lugo-Monforte-A Mariña sitúanse nos 56, o que implica un lixeiro aumento dun caso con respecto aos notificados o día anterior. Desta maneira, segundo os datos actualizados este domingo pola Consellería de Sanidade, con cifras solicitadas ata as 18,00 horas do sábado, a cifra de casos activos de enfermidade en Lugo queda nos 1.117, isto é, 22 menos ca na xornada anterior.
Por outra banda, no histórico da provincia documéntanse 117 falecementos relacionados coa pandemia. Ademais, ata o momento curáronse 4.655 pacientes e fixéronse 97.239 PCR, o que implica que na última xornada se realizaron 1.385 probas. De todas as PCR realizadas na área sanitaria, o 8,9% arroxaron un resultado positivo, polo que aínda se atopa por encima do 5% que marca a Organización Mundial da Saúde (OMS) para dar por controlada a pandemia.
HOSPITALIZACIÓNS
En canto ás hospitalizacións, na área de Lugo baixan ata 48 as persoas ingresadas -dúas menos-, das que 5 están en críticos -sen cambios-. Así pois, o Hospital Universitario Lucus Augusti (HULA) atende 26 pacientes en planta e sete na UCI; o da Mariña coida de 8; e o de Monforte, de 7.
GALICIA
No conxunto de Galicia os novos casos positivos volveron a caer ao redor dun centenar por segundo día consecutivo, ata os 457 positivos, ao descender de maneira importante nas áreas sanitarias de Vigo, de Pontevedra-O Salnés e de Santiago-Barbanza. Con todo, producíronse pequenos repuntes nas áreas da Coruña-Cee, Ferrol, Ourense-Verín-O Barco e Lugo-Monforte-A Mariña.
Neste contexto, tamén anotaron subidas as áreas de Ferrol, ata os 51 positivos diarios (+16), e Ourense, ata os 40 (+6). Pola súa banda, Lugo mantense estable con 56 e, no lado oposto, a área sanitaria de Vigo pasa á segunda posición das infeccións en 24 horas, ao caer en máis do dobre e colocarse nas 80 (-91). Tamén baixaron na de Pontevedra, con 51 novos contaxios rexistrados (-36) e en Santiago, con 54 (-15).
Así mesmo, os datos de Sanidade reflicten que ata o momento se realizaron en Galicia un total de 847.998 PCR, o que implica que en 24 horas se fixeron 7.131, cifra lixeiramente superior ao día anterior. De todas elas, o 6,8% arroxaron un resultado positivo.
